CEBU, Philippines - Ang Doce Pares ubos ni Supreme Grandmaster Dionisio 'Diony' Cañete, ODL (Order of Datu Lapu-Lapu), padayong mohatag og relief goods nga naglakip sa mga sapot, pagkaon ug tubig, construction ug building materials ngadto sa mga kaigsuonan nga nabiktima sa bagyong Yolanda.
Kini dihang ang Doce Pares USA, Philippine Integrated Martial Arts Academy ni Grandmaster Dong Cuesta, ODL, Steve Wolk, GM Don Edwards, Satori Academy of Martial Arts, Nancy Walzog ug St. Paul of the Cross mipadala og daghang mga donasyon.
Karong adlawa, ang Doce Pares uban ni SGM Cañete, ODL, mohatod sa ilang hinabang ngadto sa Daan Baantayan nga wala nila maduaw human sa pagkuso-kusog sa labing kusog nga bagyo niadtong Nobiyembre 8, 2013.
"At Doce Pares, it is instilled in us that we have a moral obligation to help the needy and that the help from our affiliated clubs are still pouring in," matud ni SGM Cañete, ODL.
Kahinumduman, ang Doce Pares mihatag sab og relief goods sa naapektohan sa bagyong Yolanda sama sa Ormoc City, Isabel, Palompon, Albuera sa probinsiya sa Leyte, Bantayan, Sta. Fe Madridejos sa isla sa Bantayan, Bogo, Tabogon ug Medellin, Tudela Poro ug San Francisco sa Camotes island.
"I am very thankful that all Doce Pares clubs from around the world practiced the Bayanihan spirit to help out," dugang pa ni SGM Cañete, ODL.
Ang Doce Pares affiliated clubs sa Europe, sa tibuok Estados Unidos ug Reunion Island, France mihatag og kuwarta ug relief goods.
Ang Reunion Island, France President nga si Robert Didier ug iyang katawhan mipadala og dul-an P500,000 alang sa relief operations niadtong Disyembre sa miaging tuig. (BANAT NEWS)