CEBU, Philippines - Nakasulod sa top three ang Sugbuanong triathletes sa Filipino elite category sa labing unang Challenge Philippines niadtong Domingo didto sa Subic Bay.
Sila si Joseph Miller ug John Philip Duenas mipahiluna sa ikaduha ug ikatulo nga dapit sa laing brand sa long distance triathlon.
Si Franklin Peñalonsa sa Taguig City maoy miangkon sa unang dapit. Gitapos niya ang lumba sud sa lima ka oras, 18 minutos ug 53 segundos, samtang si Miller mi-oras og 5:28.43 ug si Duenas milabang sa finish line sa oras nga 5:38.18. Ang kanhi national team member nga si Arland Macasieb nalandig sa ikaupat sa oras nga 5:40.06, gisundan ni Martin Lorenzo sa oras nga 5:55.25 ug sa laing Sugbuanon nga si Noy Jopson nga mi-oras og 6:14.21.
Sa laing bahin, sila si Matt Burton ug Melissa Hauschildt sa Australia, maoy hari ug rayna sa pro division. Ang Pinoy nga si August Benedicto ug si Monica Torres mao sab ang nanghawod sa Southweast Asian elite division.