Sonsona mi-KO sa kontra

CEBU, Philippines - Usa ka bangis nga kadaugan ang gihimo ni kanhi Pinoy world champion Marvin Sonsona alang sa iyang ‘comeback fight’ diin iyang gipakatug sa  third round ang kanhi world champion nga si Akifumi Shimoda  niadtong miaging  gabii didto sa Macau.  Si Sonsona kinsa   maisip nga underdog batok ni Shimoda mipakita sa iyang kusug  dihang usa  ka one-punch knockout ang gihimo niini nga mipakatug sa Japanese star.  "I was observing what Shimoda was capable of in the first two rounds before I  was able to catch  him in round three," matud pa ni Sonsona sa boxingscene.com.

Sa maong kadaugan ang  lumad nga taga-General Santos City mipalambo sa iyang record  ngadto sa 18-1, 14KOs og miangkon sa WBO International featherweight  title.  Sa iyang bahin, si  Shimoda kinsa mao unta ang naglabaw sa scorecards sud sa unang duha ka rounds sa wala pa madakpi sa bangis nga uppercut ni Sonsona nahagsa  ngadto sa 28-4, 12KOs.  Gawas ni Sonsona, laing  mga Pinoy boxers nga midaog didto sa Macau mao sila si  Harmonito DeLa Torre ug  Jerwin Ancajas. Si DeLa Torre (12-0, 7KOs) pabiling way pilde human niya gipahayang sa Indonesian nga si Yakobos Heluka (7-6, 3KOs) sa first round, samtang si Ancajas (17-1,10KOs) midemolis  ni Inthanon Sitchamuang (19-7, 10 KO’s)   sa first round.