CEBU, Philippines - Nangabot na ang kadaghanan sa mga PBA imports alang sa 2014 Commissioner's Cup unya sa Marso 7 samtang nagkumbate pa ang San Mig Coffee ug ang Rain Or Shine Elasto Painters. Gani, dinhi sa Sugbo ang tulo sa mga imports si Rob Dozier, ang reigning Best Import alang sa defending champion Alaska Aces, Richard Howell sa Talk 'N Text Tropang Texters ug si Evan Brock sa Global Port Batang Pier nga kanhi maoy import sa Air 21.
Misalmot ang Alaska, Global Port ug Talk 'N text sa tulo ka adlaw nga 2014 Charter Day Cup basketball tournament diin ang Aces maoy kampiyon.
Ang San Mig Coffee kinsa naglawig na sa kampiyonato sa PBA Philippine Cup ning pagsuwat (3-1) batok sa Rain or Shine, mikuha kang James Mays gikan sa Clemson University ug miduwa sa Brooklyn Nets sa 2012 NBA pre-season.
Ang import sa Rain or Shine mao si Alexander McLean nga produkto sa Liberty University samtang ang Ginebra palig-unan ni Leon Rodgers ug ang Ai2 21 mikuha kang Herve Lamizana nga taga Ivory Coast.
Nakakuha na unta'g import ang Barako Bull nga si Devon Dwayne Chism apan ila kining gipapauli tungod kay duna pa siya'y laing kontrata sa Hungarian Basketball League.
Ang San Miguel Beermen sa laing bahin, nagpuntariya sa NBA veteran nga si DJ White nga maoy kuhaong import. Padayon pa hinoong nangita og imports ang Red Bull ug ang Meralco Bolts. (GGM)