Mandaue City squad abante quarterfinals sa CVIRAA

CEBU, Philippines -  Walay puangod nga gilubong sa Mandaue City  ang  Carcar City, 105-28 aron moabante sa quarterfinals sa secondary basketball event sa ikaduhang adlaw sa Central Visayas Regional Athletic Association (CVIRAA) Meet 2014  kagahapon sa hapon didto sa Cebu Coliseum.

 Ang Sacred Heart School-Ateneo de Cebu (SHS-AdC) nga maoy nirepresentar sa Mandaue City, wala say kukaluoy nga milubong sa Bais City, 82-28  niadtong Pebrero 8. Gipanitan sab nila og maayo ang Bayawan City sa iskor nga 87-32.

 Laraw sa Mandaue squad ni coach Rommel  Rasmo nga mahimong "grandslam" sa maong tinuig nga kompetisyon. Ang Mandaue City nakampiyon niadtong 2011 ug sa 2012 ug paningkamotan nila nga madepensaan ang ilang korona.

 Ang Mandaue City nga mao sab ang national champion sa Palarong Pambansa sa miaging tuig,  kinahanglang modaog sa ilang duwa karong buntag batok sa Cebu Province ug sa Dumaguete City ini'g ka hapon aron moabante sa finals.

 Kun masuwertihan, posibleng ang Cebu  City Niños maoy sangkaon sa Mandaue City sa finals karong Huwebes.

 Dili hinuon sayon ang pakigsangka sa Cebu City gumikan nga gilangkuban kini sa mga piniling magduduwa gikan sa University of the Visayas (UV)  ug sa reinforcement gikan sa University of San Carlos (USC) ug Springdale.

 Ang Mandaue team pangulohan nilang Giovanni Greg Laguyo, Zachy Huang, Jair Igna ug Arnie Padilla. (BANAT NEWS)