CEBU, Philippines - Gitapos sa Cebu City Niños ang ilang swimming competition sa Central Visayas Regional Athletic Association (CVIRAA) Meet 2014 pinaagi sa paghakot og laing 12 ka bulawan, walo ka silvers ug siyam ka bronzes didto sa Cebu City Sports Center (CCSC) pool.
Nasurprisa ang Cebu Niños gumikan kay ang Talisay City maoy mihatag kanila og hugot nga kompetisyon ug dili ang Mandaue o Dumaguete nga ilang gilauman.
Ang Talisay tankers mikabkab og walo ka gold, upat ka silver ug tulo ka bronze medals. Ang Mandaue nakakuha og dugang tulo ka golds ug upat ka silvers ug duha ka bronze, samtang ang Bohol adunay usa uban ang tulo ka bronze medals. Ang Tagbilaran mitapos sa ilang kampanya bitbit ang usa ka gold, usa ka silver ug tulo ka bronzes.
Gipruybahan ni Karen Mae Indaya sa Cebu Niños nga dili tsamba ang iyang kadaugan batok sa iyang teammate nga si Lyh Ann Navarro sa unang adlaw sa kompetisyon mikabkab na sab kini og bulawan sa 800m freestyle. Nanghawod sab si Indaya sa 200m freestyle batok sa lain niyang teammate nga si Madeline Capacio.
Si Michael Kong Ichiro midaog og dugang usa ka individual gold pinaagi sa 100m butterfly ug si Rachelle Cabajar sa habig sa babaye, samtang si Christante Veloso nidaog sa 200m backstroke. Si Junvic Tiro naka-gold sab sa 100m breaststroke.
Sa elementary division, si Maria Aaliyah Suarez Biagan nidaog sa iyang ikaduhang bulawan sa 100m breaststroke, samtang si Niño Alfeo Vallespin mao sab ang naghari sa kalalakin-an.
Ang ubang bulawan nakuha gikan sa relay event. (BANAT NEWS)