Rondo bida kadaugan sa Celtics

CEBU, Philippines -  Naabtan pa og usa ka tuig  una pa nagsaulog si Rajon Rondo sa iyang kadaugan human siya mapiang ug kagahapon iyang giabagan ang  Boston Celtics pagpilde sa Orlando Magic, 96-89 sa ilang duwa sa NBA didto sa TD Banknorth Garden sa Boston, Massachusetts.

 "We didn’t stop pushing the pace even though we had the lead. We finally finished a game strong. They made a run at it, but at the end of the day we still got some stops when we needed and made the plays," matud pa ni Rondo human sa duwa.  

 Mihimo'g double-double si Rondo pinaagi sa iyang 19 puntos ug 10 ka assists aron tabangan ang Celtics  pagpakgang sa ilang four-game losing streak.

 Sa wala pa ang maong kadaugan, ang Boston wala makatilaw og daog batok sa Orlando  sa unom ka duwa gikan sa pagbalik ni Rondo sa miaging buwan. Si Rondo dul-an usa ka tuig nga wala makaduwa tungod sa ACL (anterior cruciate ligament) sa iyang tuong tuhod.

 Wala siya moduwa sa ilang ikaduhang back-to-back games sayo ning semanaha, apan mibalik kagahapon aron baswaton ang Celtics.

 Si Jared Sullinger maoy nangu sa Celtics sa iyang 21 puntos diin pito didto niya  nahimo sa fourth quarter, kansang 12 puntos nga labaw diriyot mahanaw kun wala pa makarekober sa daginutong oras.

 Bugtong si Jeff Green lang ang starter sa Boston nga pakyas pag-iskor og double figures.

 Silang Arron Afflalo ug Nikola Vucevic maoy nangu sa Magic sa ilang 18 ug 14 puntos matag usa. Si Glen Davis miamot og 15 puntos ug silang Tobias Harris ug Victor Oladipo nagkumboya'g 25 puntos. Tanang starters sa Orlando pulos miiskor og double figures.

 Ang Celtics-Magic match up maoy bugtong duwa sa NBA kagahapon.