Seattle Seahawks hari sa Super Bowl

CEBU, Philippines -  Gipamatud-an sa Seattle Seahawks nga ang depensa maoy makahatag og kampiyonato sa Super Bowl dihang ilang gipakauwawan ang kanunay untang high-scoring nga Denver Broncos, 43-8  alang sa labing una nilang NFL championship sa kasaysayan sa ilang franchise kagahapon. 

 Ang hugot nga depensa sa Seattle maoy mipugong sa opensa sa Broncos ug ang record-setting quarterback nga si Peyton Manning maoy nakapugos og upat ka turnovers hinungdan nga ang giisip untang hugot nga sangka, nahimong usa ka one-sided affair.

 Lima lang ka laing higayon nga nahimo nga ang NFL top-rated defense nakasugat og numero uno sa opensa ug ang defenders nakahimo’g 4-1 nga labaw niadtong mga engkwentroha.

 Ang Seattle ug ang ilang "Legion of Boom" defensive secondary, fast-covering linebackers ug mga determinadong pass rushers, mihimo sa maong tradisyon sa Super Bowl.

 "This is an amazing team," sumala pa ni Seahawks coach Pete Carroll atol sa paghatag  sa Lombardi Trophy ngadto sa champion team didto sa MetLife Stadium field.

 Nakapuntos ang Seattle sa duha ka interceptions alang sa second-quarter touchdowns aron mokulit og 22-0 nga abante atol sa  intermission. Ang ikaduha   gikan sa 69-yard interception return sa ilang linebacker nga si Malcolm Smith, kinsa maoy napiling Most Valuable Player.