SHS-ADC abante sa NBTC Finals

CEBU, Philippines - Gilubong sa Sacred Heart School-Ateneo  de Cebu (SHS-AdC) Magis Eagles ang karibal nilang Don Bosco Technology Center (DBTC) Greywolves, 85-37 aron moabante sa finals  sa Seaoil National Basketball Training Center (NBTC)  niadtong Domingo  didto sa Magis Eagles Arena sa Brgy. Canduman,  dakbayan sa Mandaue.

 Si Jair Igna maoy nangu sa Magis Eagles sa iyang 19 puntos samtang sila si Arnie Pailla, Janjan Jabonera ug Jose Maria Navarro pareho miiskor og double figures.

 Tungod sa maong kadaugan, ang Magis Eagles ug ang University of San Carlos (USC) Baby Warriors maoy magsangka  sa NBTC finals unya sa Pebrero 21 inig human sa Central Visayas Regional Athletic Association (CVIRAA). Kini gumikan kay ang Magis Eagles maoy morepresentar sa Mandaue City.

 Ilang huwaman isip mga re-enforcement silang Paul Galinato ug Carlo Ortega alang sa Mandaue Team.

 Nakuha sa Baby Warriors ang unang luna sa finals human sa ilang 89-78 nga kadaugan batok sa University of the Visayas (UV) Baby Lancers niadtong Sabado didto sa USC gym.

 Usa sa mga organizers sa NBTC dinhi sa Sugbu nga si coach Rommel Rasmo, nagkanayon nga ang Magis Eagles ug ang Baby Warriors maoy morepresentar ngadto sa Manila alang sa NBTC National Finals. Matud pa niya nga himuon gihapon ang finals dinhi sa Sugbu aron pag-ila sa kampiyon.

 Silang Jabonera, Igna ug Padilla sa Magis Eagles ug sila si Kevin Villagracia, Ian Orocio dela Cruz ug Paul Galinato sa Baby Warriors maoy posibleng makakuha sa "Most Outstanding Player" award.