P300,000 giandam nga premyo sa SM2SM Run IV
CEBU, Philippines - Moabot ngadto sa P300,000 nga ganting salapi ang giandam alang sa mga mananaog sa 4th SM2SM Run nga gikatakda sa Pebrero 16 diha sa SM City-Cebu.
Gipasiugdahan sa SM Prime Holdings Inc., ang mokampiyon sa 21K open mobulsa og P50,000, ang second ug third placers makaangkon og P30,000 ug P20,000 matag usa.
Ang top three finishers sa 12K open makadawat og P10,000, P7,000 ug P5,000, samtang ang top three sa 6K makaangkon og P10,000, P7,000 ug P3,000.
Gipahibalo sa organizers nga walay premyo ang 3K category tungod kay usa ra kini ka fun run.
Gawas sa mga ganting salapi ang mga mananaog hatagan usab og SM gift certificates ug overnight stay sa The Radisson Blu Hotel. May kahigayonan sab ang mga runners mga modaog atol sa raffle human sa lumba.
Sama sa miaging tuig, ang lumba gimugna isip highlight sa padayong gitukod nga SM Seaside City nga nahimutang sa South Road Properties (SRP). Manukad ang lumba sa Northwing sa SM City-Cebu paingon sa SM Seaside City sa SRP.
Ang lumba usa sab ka fund raising event alang sa Cebu Newspaper Workers Foundation Inc. (CENEWOF), Cebu City Task Force on Streetchildren ug house-building project alang sa mga biktima sa typhoon Yolanda.
"Proceeds of the run will go to our project in building homes for typhoon Yolanda survivors in the northern part of Cebu," matud pa ni Marissa Fernan, Vice President sa SM Prime Holdings Inc. atol sa press conference kagahapon didto sa Radisson Blu Hotel.
Ang registration fee nagkantidad og P750 sa 21K, P600 sa 12K, P350 sa 6K ug P3K, libre na niini ang singlet ug snacks. Ang registration booth naa nahimutang sa first level sa The Northwing sa SM City-Cebu.
Mahimo usab nga mobisita sa facebook page sa SM City Cebu (official) o motawag sa numero 232-0296. (BANAT PALARO)
- Latest
