C.J. Miles nag-wild

CEBU, Philippines - Bisan pa sa kabugnaw sa klima didto sa Cleveland dala sa "sub-  zero" temperatures sa arctic, wala kadto makapabugnaw  kang  C.J. Miles,  kinsa mihimo'g club record nga 10 ka triples dihang midaog ang Cavaliers batok sa Philadelphia Sixers, 111-93 didto sa Quicken Loans Arena sa Cleveland, Ohio.

 Daan nang mihimo'g walo ka three-pointers si Miles sa first half dihang naglabaw ang Cavs og 26 puntos nga maoy hinungdan sa ilang sayon kaayong kadaugan.

 Si Miles nga mihimo'g 10 sa iyang 14 ka tirada gikan sa three-point arc, mirehistro og season-high 34 puntos aron pangulohan ang Cavaliers.

 Ang ilang kadaugan nga maoy ikaduha sud sa 10 ka duwa, nahimo pipila lang ka oras human ilang nakuha pinaagi sa "trade" si Luol Deng gikan sa Chicago Bulls bugti sa sentro nga si Andrew Bynum ug sa umaabot nga draft picks.  Apan wala pa moduwa si Deng.  Hinuon, miduwa na ang Cavs All-Star point guard nga si Kyrie Irving human molingkod og tulo ka duwa tungod sa  hubag sa tuhod. Si Irving miamot og 16 puntos uban ang walo ka assists sud sa 30 minutos niyang pagduwa.

 Ang Sixers rookie nga si Michael Carter-Williams mihimo og season-high 33 puntos apan wala gyud makapugong ang Sixers kang Miles.

 Si Thaddeus Young sa Philadelphia, kinsa maoy napiling Eastern Conference player of the week wala makatabang sa Sixers ug ingon man sab si Evan Turner.

 Si Anderson Varejao miamot og 18 puntos ug milangkat og 14 ka rebounds alang sa Cavs.

 Ang walo ka tres ni Miles sa first half mitabla sa ilang franchise, apan wala matarog ang NBA record nga 12 ka triples nga nahimo nilang Kobe Bryant (2003) ug Donyell Marshall (2005).

 Sa laing mga duwa, dakung upset ang nahimo sa Sacramento Kings dihang ilang gipilde ang Portland TrailBlazers sa iskor nga 123-119, padayong namunit og daog ang Indiana Pacers pinaagi sa pagpilde sa Toronto Raptors, 86-79. Ang Golden State Warriors mikulit sa ilang ika-10 nga daog human nila gilubong  ang Milwaukee Bucks, 101-80, midaog  sab ang Washington Wizards batok sa Charlotte Bobcats, 97-93.

 Gilubong sa Miami Heat ang New Orleans Pelicans, 107-88,  ang New York Knicks mipilde sa Detroit Pistons, 89-85, midaog ang Chicago Bulls batok sa Phoenix Suns, 92-87,  ang Dallas Mavericks  midaog batok sa Los Angeles Lakers, 110-97.

 Ang   Denver Nuggets milubong sa  Boston Celtics, 129-98, gipilde sa Utah Jazz ang Oklahoma City Thunder, 112-101 ug  ang San Antonio Spurs nakaipsot sa Memphis Grizzlies, 110-108 pinaagi sa overtime. (BANAT NEWS)