CEBU, Philippines - Tanang paagi gihimo ni Stephen Curry aron modaog ang Golden State Warriors nga mipukan sa defending champion Miami Heat, 123-114 sa National Basketball Association kagahapon didto sa American Airlines Arena sa Miami, Florida.
Lain na sab nga halandumong gabii alang kang Curry kay siya ang topscorer pinaagi sa iyang 36 puntos ug mihimo'g game-high 12 ka assists, upat ka steals ug walo ka triples. Nakakuha sab siya og dakung suporta gikan ni David Lee, kinsa miposa og 32 puntos uban sa iyang 14 ka rebounds.
Ang seven-game winning streak sa Warriors mao karon ang labing taas sa NBA.
Tulo lang ka players ang miiskor og labing menos 35 puntos batok sa Miami ug gawas kang Curry, ang laing duha mao silang Michael Jordan ug Allen Iverson.
Silang Klay Thompson ug Harrison Barnes miamot og 16 ug 15 puntos matag usa alang sa Warriors.
Si LeBron James maoy nangu sa Heat pinaagi sa iyang 26 puntos, samtang si Dwyane Wade midugang og 22 puntos. Sumala pa sa STATS, ang 123 puntos nga gihimo sa Warriors maoy labing daku nga gitugot sa Heat sa ilang homecourt sukad nagkauban silang James, Wade ug Chris Bosh.
Sa laing duwa, gipakuratan sa Brooklyn Nets ang Oklahoma City Thunder pinaagi sa buzzer-beating shot ni Joe Johnson, 95-93, gipilde sab sa New York Knicks ang San Antonio Spurs, 105-101, ang Cleveland Cavaliers midaog batok sa Orlando Magic, 87-81 pinaagi sa overtime. Ang Chicago Bulls midaro sa Boston Celtics, 94-82, ang Memphis Grizzlies mipukan sa Phoenix Suns, 99-91, ang Utah Jazz nakaipsot batok sa Milwaukee Bucks, 96-97, ang Philadelphia Sixers mipukan sa Sacramento Kings, 113-104 ug gilubong sa Portland TrailBlazers ang Charlotte Bobcats, 134-104.