CEBU, Philippines - Gipakauwawan sa Toronto Raptors ang No. 1 team Indiana Pacers pinaagi sa paglubong sa iskor nga 95-82 sa nagpadayong duwa sa National Basketball Association kagahapon didto sa Air Canada Centre sa Toronto, Ontario, Canada.
Miiskor si DeMar de Roza og 26 puntos, samtang si Terrence Rose miamot og 18 puntos alang sa Raptors nga miinat sa ilang winning streak ngadto sa upat. Sila si Kyle Lowry ug Jonas Valanciunas mitampo'g 13 puntos matag usa, apan si Lowry mihimo'g season-high 14 ka assists alang sa Raptors.
Sa kasamtangan, ang Raptors nagbitbit na og 15-15 nga baraha ug nakaabot na'g .500 human ilang maputol ang lima ka sunod-sunod nga daog sa Pacers.
Katapusang nakahimo’g .500 ang Raptors niadto pang Enero 6, 2010.
Ang sentro sa Pacers nga si Roy Hibbert na-fouled out sa maong duwa bitbit ang 16 puntos, samtang si Paul George adunay 12 puntos.
Ang Pacers mitala sa ilang season-worst 23 turnovers lakip na niini ang unom nga nahimo ni George. Si Danny Granger igo lang miamot og 11 puntos.
Sa lain pang mga duwa, ang Dallas Mavericks mitiklo sa Washington Wizards sa iskor nga 87-78, midaog sab ang Minnesota Timberwolves pinaagi sa paglubong sa New Orleans Pelicans, 124-112.
Gilubong sab sa Philadelphia Sixers ang Denver Nuggets, 114-102 ug ang Los Angeles Clippers miihaw sa Charlotte Bobcats sa iskor nga 112-85. (BANAT NEWS)