CEBU, Philippines - Gawas sa tinuig nga election sa mga opisyales sa Cacoy Doce Pares World Eskrima Federation karong gabii, dunay mga pasundayag nga himoon tali sa mga sakop sa Doce Pares nga naglakip sa pipila ka mga langyaw nga tinun-an diha sa ilang headquarters sa dan C. Padilla, ning dakbayan.
Gikatakda nga pilion na sab sa ika-25 nga higayon isip presidente sa Doce Pares si Supreme Grandmaster Ciriaco "Cacoy" Cañete kinsa maoy himoong "lifetime" president. Siya maoy mipuli sa iyang igsoon nga si Yoling Cañete kinsa namatay kaniadtong 1988.
Magsaulog sab ang Doce Pares sa ilang ika-82 nga anibersaryo karong umaabot Enero 11, 2014 diin maoy ilang guest speaker ang Fil-Am nga si Richard Bustillo nga tua na manimuyo sa Los Angeles, California. Si Bustillo kanhi estudyante ni legendary martial arts action star Bruce Lee.
Tambongan ang maong piniliay karong gabii hangtod na ngadto sa induction sa Enero sa mga langyaw nga tinun-an ni SGM Cañete nga silang Anton St. James kinsa usa ka Doce Pares instructor didto sa United Kingdom, ship captain Curt Jablin gikan sa Arizona, USA, Australian grandmaster Craig Ames ug ang iyang pangasaw-onon nga Korean national Tamiko Bascombe.