Doce Pares election himuon ugma

CEBU, Philippines -  Ipahigayon ugma  Disyembre 30 ang tinuig nga piniliay sa Cacoy Doce Pares World Eskrima Federation   diha sa ilang headquarters sa dalan C. Padilla, ning dakbayan.

 Si Supreme Grand Master Ciriaco 'Cacoy' Cañete gipaabot  nga gihapon maoy pilion pagka-presidente sa ika-25 nga sagunson nga katuigan. Si Cañete napiling presidente    niadtong 1988 human siya mopuli sa iyang maguwang nga si anhing Eulogio 'Yoling' Cañete,   nga  namatay niadtong tuiga.

 Ang Doce Pares nga maoy labing karaan nga eskrima association dinhi sa Sugbu  gitukod sa walo ka mga managsuong Cañete   niadtong tuig 1932, magsaulog sa ilang ika-82 nga anibersaryo unya sa Enero 11, 2014 nga mao sab ang petsa sa ilang induction of officers.

 Ang Fil-Am nga si Richard Bustillo, kanhi estudyante ni legendary martial arts actor Bruce Lee, maoy gidapit nga guest speaker. Siya sab ang founder sa International Mixed Martial Arts and Boxing (IMMB) nga atua nagbasi sa Los Angeles, California.

 Adunay labing menos upat ka langyaw ang motambong sa election ug ingon man sa induction nga padayong nag-ensayo sa Doce Pares.

 Kini  naglakip nilang  Anton St. James sa Great Britain nga usa ka chief instructor sa Doce Pares-England, American ship Captain Curt Jablin gikan sa Scottdale, Arizona ug  ang kaslonon karong Enero 4 nga silang Australian Craig Ames ug Korean fiancee Tamiko Bascombe. (BANAT PALARO)