CEBU, Philippines - Ang Alaska Basketball Cup (ABC)-Cebu, ang usa ka bulan nga development program alang sa aspiring hoopsters pormal nga
gilusad kagahapon didto sa Yayoy's Grill and Restobar.
Ang kalihukan gipangulohan ni Alaska Milk Sports Development Head Dicky Bachmann ug Basketball Camp Director Jojo
Lastimosa.
Ang ABC-Cebu maoy panaghugpong tali sa Alaska Milk ug sa Cebu Youth Basketball League (CYBL).
Ang CYBL gitukod niadtong 2007 tungod kay walay igong mga kalihukan sa basketbol alang sa boys 16 ug paubos.
Nagkinahanglan ang Sugbu og solidong usa ka tuig nga programa sa maong kalihukan alang sa boys 16 and under.
Gumikan niini, ang CYBL maoy nahimong importanteng binyu alang sa mga magduduwa aron mobaid sa ilang abilidad sa natad
sa basketbol.
Ang CYBL nagsugod nga aduna lay upat ka teams ug usa ka age group niadtong 2007. Mitubo kini ngadto sa 35 ka koponan ug
tulo ka age groups (Under 11, 13 ug 16) sa tuig 2011. Karon sa ilang ikapitong tuig, ang CYBL ug Alaska Milk mapasigarbuhong
mipahibalo sa ilang panaghugpong.
Ang ABC-Cebu mopahigayon og tulo ka conferences tibuok tuig sugod sa Enero 2014 ug coaches' program sa Disyembre.
Human sa Cebu, ang Cup molusad sab og samang kompetisyon didto sa Metro Manila, Lucena ug Davao.
Ang mga tunghaan, institusyon ug indibidwal nga buot pang makakuha og dugang impormasyon kabahin sa Alaska Basketball
Cup mahimong mo-log on sa www.alaskapowercamp.com/basketball. Mahimo sab nga mo-like sa Facebook page, Alaska Basketball Power
Camp o sunod lang sa twitter; @ALASKAsportshub. (BANAT NEWS)