27th Southeast Asian Games

Nagpaila kung unsa gyud ka mahiligon sa basketball ang Pilipinas. Mismo ang ilang pwesto karon sa nagpadayon nga 27th Southeast Asian Games didto sa Nay Pyi Taw, ang bag-ong capital city sa Myanmar (kanhi Burma), ang RP Team naa sa ikapito nga dapit, ang  paboritong jersey number ni basketball legend Robert Jaworski.

Nag-anam na ka scientific ang mga sports events o disciplines dili lang dinhi sa Southeast Asian region diin nalakip ang Pilipinas, apan labi na gyud didto sa Estados  Unidos ug uban pang mga adunahan nga nasud didto sa Europe ug South America.

Bisan gani dinhi sa Asian region, dako kaayong taghap modaug kita sa China, Japan, South Korea ug India nga maoy gitawag og sports super power mao nga pwerte natong layat-layat dihang midaug kita batok sa mga Koryano sa miaging FIBA-Asia.

Sa kasamtangan nga medal tally (as of 12 noon, December 15), ang RP Team nakakuha na'g 33 ka medalya diin pito niini ang gold, 11 ang silver ug 15 ang bronze. Ang kinatibuk-an natong nahakot nga 33 ka medalya, bronze medal lang sa Vietnam kinsa adunay 29 ka gold ug 23 ka silver.

Ang nag-una karon sa medal tally mao ang Thailand (33 G, 30 S, 30 B), second ang host Myanmar (31 G, 29 S, 28 B), third ang Indonesia (30 G, 40 S, 34 B), fourth ang Vietnam (29 G, 23 S, 33 B), fifth ang Malaysia (18 G, 12 S, 31 B) ug sixth ang Singapore  (12 G, 10 S, 19 B).

Tingali sa atong ika-pitong pwesto, maglisod na kita'g abante sa top three ilabi na kay basketball ra gyud kanunay ang atong gisaligan nga event. Sa 11 ka nasud nga misalmot karon sa 27th SEAG, igo lang gyud intawon kining milabaw sa Cambodia, sa Lao, sa Brunei Darussalam ug sa pinaka-iwit nga Timor-Leste.

Karon maoy finals sa basketball event tali sa Sinag Pilipinas (ang men's basketball team) batok sa Malaysia ug hayan mapun-an og usa ang atong gold medal. Wala pa'y pahibalo kung unsay skedyul sa Perlas ng Pilipinas (ang women's basketball team) ilabi na karon kay nagsukarap na kini.

Gisugdan ang Southeast Asian Games (SEAG) niadtong 1977 ug sa 36 ka tuig nga kita misalmot, usa lang ka higayon nga kita maoy nahimong overall champion ug kini nahitabo niadtong 2005 diin ang Pilipinas maoy host ug gani, may pipila ka events nga gipahigayon dinhi sa Sugbo ug didto sab sa Bacolod.

Ang RP Team mihakot og 113 ka medalya niadtong tuiga nga maoy labing daghan ug atong nalabwan ang medal haul sa tuig 1991 diin maoy second placer ang Pilipinas sa atong 90 ka medalya. Unang mi-host ang Pilipinas sa SEAG niadtong 1981 diin kita maoy third placer ug mihakot kita'g 55 ka medalya.

Niadtong 1993 ang Pilipinas maoy third placer sa SEAG sa atong 57 ka medalya ug niadtong 1995, kita gihapon maoy third placer sa atong 33 ka medalya. Sa atong tulo ka higayon isip host sa SEAG (1981, 1991 ug 2005), atong nakuha ang 1-2-3 finishes--no. 1 sa 2005, no. 3 sa 1981 ug no. 2 sa 1991.

Maayo diay unta og kita lang maoy pirmeng mo-host aron dili gyud kita matagak sa Top 3 apan daw dili sab kini mahitabo kay dako man sab og gasto kining mag-host kita'g international sports event.

MISCELLANEOUS. Belated birthday greetings to Mark Anthony John Agustinez who turned 15 years last Friday, December 13. The young Agustinez is a player of Don Bosco SBP-Passerelle under coach Danny Aying and could be a potential center for the Junior Greywolves in the upcoming 2014 CESAFI season. His proud father, Renato Agustinez, is my paisano from Camotes island who just  passed the Customs Brokerage exams here in Cebu and is now a licensed Customs broker.