Pacquiao-Mayweather megafight imposible

 Nanggawas karon ang mga balita nga si Kongresista Manny Pacquiao mao nay mandatory challenger sa bakus ni Floyd Mayweather Jr. sa World Boxing Council (WBC).

 Apan sa gihapon, nangita si Mayweather og rason aron dili gyud niya makaatbang si Pacquiao. Tataw kaayong mitalaw gyud siya. Daghan pa kaayo siyang mahuna-hunaan pa aron lang gyud makalikay kang Pacquiao.

 Ang bag-ohay niyang rason, napilde kuno si Pacquiao kaduha, kausa pa lang kini makabawi sa sangka kang Brandon Rios. Unya, iyaha sab gitandi ang gikita sa Pacquiao-Rios fight sa ilang sangka ni Saul Alvarez.

 While it is true gyud nga gamay ang gikita sa Pacquiao-Rios fight, tungod ni kay daghan ang nakatagna nang daan nga kulatahon lang ni Pacquiao si Rios. Ikaduha, dili sa Las Vegas gihimo ang sangka kun dili sa Macau nga bag-ohay pang mi-venture og hosting sa mga bigtime boxing events.

 Laing rason ni Mayweather nga dili sila parehas og promoter, si Mayweather motrabaho lang sa iyang kaugalingong promotional outfit nga Mayweather Promotions ug makigtrabaho usab sa Golden Boy Promotions ni Oscar dela Hoya.

 Samtang si Pacquiao, adto sa Top Rank ni Bob Arum nga gikabingkil na ni Mayweather. Ug ang lain pang rason, si Mayweather anaa sa Showtime, samtang si Pacquiao sa HBO.

 Duna pay demanda unya ni Mayweather nga Olympic style drug test, dayon modemanda na usab ni siya og hinakog nga bahin sa kitaon unya ug uban pa.

 Ang kuyaw ani, kun ang kining ato tanang gipanghisgutang mga rason maplantsa gyud no? Unsa kahay buhaton ni Mayweather?

 Basin, mangulata na lang usab ni siya og babaye o sa iyang kapuyo aron mapriso pag-usab aron dili lang gyud makatilaw sa kumo ni Pacquiao

 Ang Pacquiao-Mayweather megafight unta mao na ang gipaabot nga kulbahinam nga sangka sa duha ka mga banggiitang boksidor karong panahona.

 Apan ang pangutana, mosukol ba kaha si Mayweather? Ang tubag, kaduha-duhaan pa.

 Nindot na unta kaayo paminawon tong nanggawas nga balita sa kalibotan sa boksing, si Mayweather na mismo ang miingon nga “kung si Pacquiao! Si Pacquiao!; Kung si Amir Khan! Si Amir Khan!”

 Apan kung tinud-anay pa nga “kita” maoy giagpas ni Floyd, nganong kang Amir Khan man? Dili man gyud ni mohalin og dako kun itandi sa Pacquiao-Mayweather fight, di ba?

 Sa ato pa, duna gyu'y gikahadlokan si Mayweather kang Pacquiao, apan dili lang gyud niya angkunon sa publiko.

 Sa klaro gyung pagka-estorya, hangtod karon wala pay solusyon si Mayweather sa fighting style ni Pacquiao.

* * *

 PAGTULON-AN: "After climbing a great hill, one only finds that there are many more hills to climb." -- NELSON MANDELA

 [email protected]