Mancio moaway na sa OPBF title
CEBU, Philippines - Moaway na si ALA Boxing Gym stalwart Jerson 'Smooth Operator' Mancio (18-3-3, 9KOs) uban ang paglaum nga mahimong regional champion sa dihang iyang sangkaon ang Japanese fighter nga si Naoya Inoue (4-0, 3KOs) alang sa bakanteng Oriental and Pacific Boxing Federation (OPBF) light flyweight belt karong adlawa didto sa Kokugikan, Tokyo, Japan.
Ang 25-anyos nga si Mancio mag-atubang og lisud nga hagit sa pagsakmit sa bakus didto sa balwarte sa iyang kontra, apan ang garbo sa Esperanza sa Agusan del Sur determinado nga makuha niya ang OPBF belt.
Sila si Mancio ug Inoue pulos mikuha sa timbang nga 108 lbs. atol sa weigh-in kagahapon.
Kini ang ikaduhang OPBF title shot ni Mancio sukad siya napilde ngadto ni Ryo Miyazaki pinaagi sa fourth round TKO niadtong Oktubre 2, 2011 didto sa IMP Hall sa Osaka, Japan.
Si Mancio adunay five-fight winning streak nga gitapos sa usa ka technical decision nga kadaugan batok ni Jovel Romasasa niadtong Agosto 17 didto sa Magsaysay Park sa Davao City.
"Pabor si Mancio kun experience pero dili ni sayon nga away niya kay didto man sa Japan giduwa," matud pa ni ALA chief tactician Edito Villamor.
"Salig hinuon ko ni Mancio kay nag-training gyud ni siya og maayo aron madala dinhi sa Pilipinas ang bakus," dugang pa ni Villamor.
Si Mancio nahimo sab nga Philippine 108-pound champion human sa iyang fifth round TKO nga kadaugan batok ni Charlie Cabilla niadtong Abril sa miaging tuig didto sa Mandaue City Plaza Square sa Brgy. Centro, Mandaue City. (BANAT PALARO)
- Latest
