CEBU, Philippines - Human sa Customs Invitational, ang MJDL Brokers mosuway paglangkat og laing korona sa ilang pakigsangka sa Rollway-Petracorta Brokers sa "knockout" finals sa CIPU-BOC Fellowship Cup karong gabii diha sa Cebu Coliseum.
Ang duwa sugdan sa alas-9 sa gabii.
Sa dili pa magkumbati ang MJDL ug Rollway-Petracorta, magsangka una ang Global Carrier ug ROSCAN Liners sa pasiunang duwa alang sa ikatulong dapit nga sugdan sa alas-7 sa gabii.
Miabante sa finals ang MJDL ug Petracorta human ilang gitagak ang managlahi nilang kontra sa semifinals sa miaging semana.
Ang MJDL magsalig sa managsuong Medalle nga silang Noel ug Baeng uban nilang Nico Laborte, Janus Abellana, Daniel Enriquez ug Bikeng Rollon samtang ang Petracorta mosalig kanilang Glenn Urbina, Francis Palero ug Takloy Moral.
Sa laing bahin, ang Global Carrier adto mopuntariya sa ilang opensa kang Ramil Aniñon ug Kenneth Maningo ug ang ROSCAN mosalig nilang Rex Bensi, Gerry Singson, Jim Villa, Michael Almodal, Jonas Cayanong, Dodong Manlosa ug Ferdie Sigue.