CEBU, Philippines - Masaligon si two-time MVP Danny Ildefonso nga ang Sugbuanong si Junmar Fajardo sa Petron Blaze Boosters maoy modominar sa mga frontcourt players sa umaabot nga PBA season bisan pa sa pagpanulod sa mga batan-on ug dagku nga basketbolista gikan sa miaging sa rookie draft.
Si Fajardo, ang No. 1 pick sa miaging tuig mipakita sa iyang dakung potensiyal sa miaging Governor's Cup nga nagtuboy kaniya aron mahimong "Best Player of the Conference" uban sa iyang makanunayong double-double performance sa season ending nga torneyo.
Gumikan kay limitado ang iyang duwa sa first conference tungod sa injury, ang 6-foot-9 nga si Fajardo napide sa karera alang sa "Rookie of the Year" ngadto ni Calvin Abueva sa Alaska Aces, apan nakakuha siya'g luna sa mythical season team.
Napanglantawan sa mga tigpaniid sa PBA ang hugot nga kompetisyon sa ilawom sa pagsulod nilang Greg Slaughter, Ian Sangalang ug Raymond Almazan.
Ang labing gikahinaman mao ang Fajardo-Slaughter showdown. Ang duha nagribal na sa Cebu Schools Athletic Foundation Inc. (CESAFI) dihang si Fajardo niduwa sa University of Cebu (UC) Webmasters ug si Slaughter sa University of the Visayas (UV) Green Lancers.
Laing pang mga higante nga mopakita una nilang labok isip pros karon nga season mao sila si Fil-Am Isaac Holstein ug Justin Chua.
Si Fajardo mapasalamaton ngadto ni Ildefonso tungod sa tabang niini sa iyang praktis nga nakapa-asenso sa iyang duwa.
Nakatabang sab og daku ang iyang training uban sa Gilas Pilipinas.