Strike open chess tourney gitakda sa Nobiyembre 2-3
CEBU, Philippines - Ang Four Central Squares, nga affiliate sa National Chess Federation of the Philippines (NCFP), mopahigayon og 1st Strike Open Chess Tournament karong Nobiyembre 2-3 diha sa Robinson's Cybergate.
Dul-an sa P20,000 ang giandam nga ganting salapi alang sa top performers sa duha ka adlaw nga torneyo nga motamod og 7-round Swiss system format gamit ang game point scoring system.
Ang kampiyon sa open category mobulsa og P4,000, ang ikaduha makaangkon og P3,000 ug ang ikatulo makadawat og P2,000.
Ang fourth ug fifth placers gantihan og P1,000 matag usa, samtang ang top female finisher makadawat og P500 bonus.
Sa kiddies (14-under) division, ang top three makadawat og P3,000, P2,000 ug P1,000, samtang ang ikaupat ug ikalima ug ingon man ang top female player makaangkon og P500 matag usa.
Aduna kini registration fee nga P150 alang sa kiddies ug P200 alang sa mga partisipante sa open category.
Alang sa dugang pang mga kasayoran, niadtong interesadong mosalmot mahimong mokontak ni FIDE Arbiter Felix Poloyapoy Jr. sa 0933-6642958 o di ba ni tournament director Eduard de la Torre sa 0932-8622010 o Glenda Tatoy sa 0908-4860641.
Ang kalihukan gidalit sa Four Central Squares uban sa suporta sa Robinson's Land Corporation pinaagi sa ilang assistant marketing communications officer Ms. Avigael C. Manigo.
- Latest
