Batua MVP-ROY sa CCSC E-League
CEBU, Philippines - Si Archie Brian Batua sa Accenture Shark maoy labing masidlakon sa mga top individual achievers sa 9th CSCC E-League dihang iyang gipakyaw ang Southern Conference MVP ug Rookie of the Year awards.
Si Batua maoy ikaduhang magduduwa sa kasaysayan sa siyam na ka tuig nga liga nga misakmit og duha ka dagkung dungog sunod ni Sylvester Millevo sa Stream Ingenyouity, kinsa napili nga MVP sa Northern Conference.
Sila si Batua ug Mellivo awtomatik na nga maapil sa Mythical Five uban sa teammate ni Batua nga si Ryan Edward Llanos, Franco Angelo Cipriano sa Lexmark Stallions ug Ryan Veloso sa Aegis Vipers.
Nag-una sab si Batua sa nilangkatay sa bola nga mi-average og 9.6 rebounds matag duwa.
Ang higanteng si Robert Gilo sa ePerformax Reds maoy giilang "Tapal King" nga adunay 2.67 blocks matag duwa, si Giovanni Villahermosa sa Lexmark maoy lider sa assists sa iyang 4.4 matag duwa, samtang si Chris Judilla sa Calltek Trojans maoy abtik mangilog og bola nga adunay 2.9 steals matag duwa.
Sa iyang bahin, si Clifford Amarado sa Telstra-Teletech Titans maoy scoring champion karon nga seasons nga moiskor og 23.57 puntos matag duwa.
Ang top individual awardees pormal nga pasidunggan atol sa Game-2 sa CSCC E-League Finals.
Sa laing bahin, ang Lexmark tuyo mohimo og 2-0 sweep batok sa Accenture sa ilang "best-of-three" alang sa Southern Conference title karong weekend. Ang modaog sa series maoy moharong sa Northern Conference champion Aegis alang sa overall championship. (BANAT PALARO)
- Latest
