PSC-PHILTA junior netfest gitakda
CEBU, Philippines - Pipila ka mga umaabot nga tennis players dinhi sa nasud ang mag-abot dinhi sa Sugbu alang sa PSC-PHILTA Junior Tennis Championships karong Oktubre 28 diha sa CITCI-Consolacion Tennis Club sa Brgy. Laray, Consolacion.
Ang torneyo naglatid sa singles ug doubles event. Ang singles naglangkob sa 10-under unisex ug boys and girls 12, 14, 16 ug 18-under, samtang ang doubles adunay 10-under unisex ug 15 and 18-under age groups.
Giila sa Philippine Tennis Association (PHILTA), ang torneyo gipaluyohan sa lokal nga kagamhanan sa Consolacion ug Slazenger.
Pipila ka mga dekalibreng magduduwa gikan sa Manila nga silang Manuel Balce III, Jose Thomas Bernardo ug Ma. Dominique Ong ang mosalmot sa kalihukan.
Ilang sukdon ang abilidad sa mga pambato sa Sugbu sama nilang Jana Pages, Cesar Kristofer ug Kristin Renee Salimbangon, Harland Hogan, Francis Gener Lambayan, Shyne Villareal, Zethley Mae Alferez, Marc Suson ug Jan Godfrey Seno.
Usa ka magduduwa gikan sa Hong Kong nga si Noelle Vanasse Wilbert mosalmot sab sa maong kompetisyon.
Ang deadline sa pagsumiter sa mga entries hangtod lang karong Sabado sa udto.
Alang sa dugang mga kasayoran, mahimong motawag sa PHILTA RVP Juanito Cansino Jr. sa 0908-7432405 o e-mail sa [email protected] (BANAT NEWS)
- Latest
