Lancers buhi pa

CEBU, Philippines - Nasumpo gyud sa University of the Visayas (UV) Green Lancers  ang lima ka sagunson nga daog sa Southwestern University (SWU) Cobras karon nga season human sa ilang 89-82 nga kadaugan pinaagi sa double overtime kagabii sa Game 3 sa ilang best-of-five championship series sa 13th season sa Cebu Schools Athletic Foundation, Inc. (CESAFI) didto sa Cebu Coliseum.

Walo ka sunod-sunod nga puntos gikan ni John Abad sa second overtime maoy nakasalbar sa Lancers kinsa biya pa gihapon sa series, 1-2 bisan sa maong kadaugan apan ang importante, wala sila ma-sweep sa Cobras.

Dako sab kaayo og natabang si Mike Harry Nzuesseu sa maong kadaugan ilabi na sa iyang mga puntos sa ilawom sa first overtime. Siya maoy nangu sa Lancers sa iyang 26 puntos samtang midugang si Abad og 20 puntos.

Nag-anam og kahurot ang mga players sa Cobras dihang na-fouled out ang ilang mga sinaligan nga naglakip sa ilang import nga si Landry Sanjo, Monbert Arong ug Daryl Goloran kinsa pulos mibahug og double figures alang sa ilang team. Si Sanjo maoy nangu sa Cobras sa iyang 23 puntos, may 16 puntos si Arong ug may 10 puntos si Goloran samtang si Bernie Bregondo miabuno og 13 puntos.

Bisan og kanunay mabiyaan ang Lancers, naka-apas sila sa kadugayan ug matod pa ni coach Felix Belano ilang natuman ang ilang game plan sa opensa ug depensa ug padayon silang mo-focus sa duwa ugma sa Game 4.

Gihatagan lang gihapon ni coach Belano og credit si Wowie Escocio tungod sa iyang depensa bisan pa og daghan kaayo siyang sipyat sa free throws.

Dili na unta mahitabo ang overtime dihang nakapasulod og three-pointer si Abad aron hatagan og 68-65 nga labaw ang Lancers apan dali kining gitabla ni Arong pinaagi sab sa iyang triple, 68-all ug may 6.5 pa ang nahibiling oras.

Maayo gihapong nakaduwa ang Lancers sa first overtime ug dili na unta mahitabo ang laing five-minute extension tungod kay naglabaw na sab ang Lancers og tres puntos, 77-74 human sa split charities ni Alfred Codilla.

Apan sa ikaduhang higayon, gisalbar ni Arong ang Cobras human sa iyang krusyal kaayong three-pointer aron ihatud ang duwa sa laing overtime, 77-all may 6.5 gihapon ang nahibiling oras.

Sa sayo pa, midaug ang University of San Carlos (USC) Warriros sa lain sab nga kulba-hinam nga duwa batok sa University of San Jose Recoletos (USJR) Jaguars, 74-71 aron sakmiton ang ikatulong pwesto.

Nahanaw sama sa bula ang 21 puntos nga labaw sa Warriors,36-15 ug milabaw pa gani ang Jaguars didto sa fourth period, 60-58 ug 63-62 sa parehong basket gikan ni Christian Parker.

Upat ka players sa Jaguars ang na-fouled out nga silang James Regalado, Miguel Tabaloc, Rendell Senining ug Parker.

Si Ahmed Salihou maoy nangu sa Warriors sa iayng 19 puntos samtang mibahug sab og 19 puntos si Parker aron pangulohan ang Jaguars.

Puntos matag usa:

First Game:

USC (Coll.) 74---    Salihou 19, Plata 14, Magat 13, Ortega 11, Rabat 6, Adlawan 4, Amin 4, Guardiario 3.

USJR (Coll.) 71---   C. Parker 19, Tabaloc 17, Lajato 11, Regalado 8, M. Parker 7, R. Senining 3, Cinco 3, Bayhonan 2, Sanchez 1.

Second Game:

UV (Coll.) 89---      Nzuesseu 26, Abad 20, Codilla 11, Santillan 10, Escocio 8, Villamor 6, Perolino 4, Mendoza 2, Akomo 2.

SWU (Coll.) 82----   Sanjo 23, Arong 16, Bregondo 13, Goloran 10, Panerio 7, Tallo 6, Mohammed 5, Siewe 2. Halftime: 28-39. (BANAT NEWS)