Non-bearing games sa CESAFI

CEBU, Philippines - Tapuson na ang semifinal round sa seniors division sa Cebu Schools Athletic Foundation Inc. (CESAFI) basketball event diin suwayan sa defending champion Southwestern University (SWU)  Cobras pagkulit og 12-0 sweep karong gabii  diha  sa  Cebu  Coliseum.

  Sa laing bahin, wala pa masayri kun kanus-a tiwason ang sa juniors division human kini gikanselar ni commissioner Felix O.

Tiukinhoy  Jr. ang mga duwa taliwala sa mga kasikas karon sa liga.

 Tinguha karon sa Cobras nga haruson ang ilang unom ka duwa sa semifinals aron sila   maoy maghupot ug hapsay nga record dihang ilang sangkaon ang University of San Carlos (USC)  Warriors sa main game sa alas-6:15 sa gabii.

 Sa dili pa ang ilang engkuwentro, ang University of the  Visayas (UV)  Green Lancers  tinguhang motapos sa ilang kampanya sa semis pinaagi pag-iskor og daog sa ilang pakigsangka batok sa University of San Jose-Recoletos (USJ-R) Jaguars sa opener nga gitakda sa alas-4:30 sa hapon.

 Matawag og "non-bearing" na ang mga duwa karon sa collegiate division kay ang SWU ug UV segurado na nga maoy mag- abot pag-usab sa "best-of-five" finals nga sugdan sa Septiyembre 24.

 Sa miaging season, ang duha mao usab ang  nag-abot diin nakuha sa Cobras ang korona.

 Tungod sa ilang tahas nga  tapuson ang  semifinals nga walay pilde, dili mahitabo nga mokompyansa ang Cobras ug ila  gihapon paduwaon silang Landry Sanjo ug Fabrice Siewe ilabi na kay taas karon og moral ang Jaguars human sila maka-upset batok sa Warriors.  (BANAT PALARO)