Hoopers nabaraw sa picpa

CEBU, Philippines - Giputol sa PICPA BULLS ang four-game winning streak sa league-pacesetter Hoopers quintet ni Yoly Meso pinaagi sa ilang 70-63 nga kadaugan kaniadtong Sabado alang sa ilang 2-3 nga baraha atol sa nagpadayon nga elimination round sa Philippine Institute of Certified Public Accountants (PICPA)  2013 basketball tournament didto sa Capitol Parish gym sa dan Escario, ning dakbayan.

Sayong naglabaw ang PICPA Bulls sa ilang 28-16 sa opening period pinaagi sa pagtimon nilang  Edlin Endrina ug Art Flores apan bisan pa og undermanned ang Hoopers, nakasikit  gihapon sila atol sa halftime, 38-40 pinaagi sa mga puntos gikan nilang Junar Torres ug three-point artist nga si Lito Ortiz.

Hinoon, kanunay nang naglabaw ang PICPA didto sa third period, 53-50 ug padayong naglabaw pagsugod sa fourth period ug wala na mailog sa Hoopers ang labaw.

Si Endrina maoy nangu sa rally sa Bulls didto sa fourth period diin mhimo siya'g 13 sa iyang game-high 31 puntos. Giabagan siya nilang Art Flores ug Ryan Alejandre kinsa midugang og 10 puntos matag usa samtang silang Torres ug Ortiz maoy nangu sa Hoopers  sa ilang 17 ug 15 puntos, matag usa.

Miamot sab og 11 puntos si Meso sa maong duwa.

Sa laing duwa, midaug ang Picpa Wildcats ni Rainer Mora pinaagi sa default batok sa Picpa Snipers samtang ang  Phoenix midaug sab pinaagi sa default batok sa Intangibles.

Puntos matag usa:

BULLS (70)- Endrina 31, Alejandre 10, Flores 10, Navales 6, Oliveros 5, Ibo 4, Arquillino 2, Al. Yu 2.

HOOPERS (63)- Torres 17, Ortiz 15, Meso 11, Canonigo 8, Prosia 6, Prieto 6. (BANATSPORTS)