Hinaot dili modagan sa Floyd
Minakmakay na! Karong adlawa mao na ang sangka nilang Floyd Mayweather Jr. ug Mexican star Saul Alvarez alang sa 154-pound world championship belt didto sa MGM Grand Arena.
Si Alvarez (42-0-1) nga nag-edad pa og 23-anyos nakakuha sa timbang nga 152 pounds, samtang ang 36-anyos nga si Mayweather (44-0-0) miabot og 150.5 pounds.
Sama sa gihapon, nagbula-bula na usab ang baba ni Mayweather nga excited na daw siya sa maong sangka.
Sa akong tan-aw daku kaayo ang purohang modaog si Mayweather ani nga sangka tungod kay mas taas kini'g kasinatian ug estilo sa iyang inawayan nga dili makigsagol.
Apan daku akong pagtuo nga "boring" ug wala kaayo'y aksyon ang mahitabo sa sangka sa duha karon.
Si Mayweather usa sa mga labing maayong defensive boxer ug labing paspas usab modagan palayo sa kontra. Iyang estilo "sukol-dagan" kapuyon na lang tang nanan-aw ug magsurok ang dugo sa mga di ganahan ni Floyd.
Si Canelo magpunay lang kining abante ug gukod kang Floyd hangtod nga matapos ang 12 ka rounds. Uwahing nakapatumba og kaatbang sa Floyd niadtong 2012 batok ni Victor Ortiz sa ilang 147 pound fight.
Na-knockout si Ortiz niadto, apan gisaway og maayo si Mayweather tungod sa pagka–bentahoso. Si Ortiz nagtan-aw sa referee niadtong tungora dihang gisekretohan og sukmag ni Mayweather. Hinuon sayop sab to ni Ortiz kay nagdanghag man.
* * *
Nahimong kulbahinam ang torneyo sa Newsmen’s Basketball Association of Cebu (NBA-C) sa panag-abot sa Defense-PNP Press Corps (DEPP) ug City Hall (CHARM) reporters sa first game kagahapon dihang nagdaog kini sa foul throw sa final score nga 81-80.
Milli-seconds na lang dihang gi-foul sa usa sa tulo ka mga defenders sa CHARM si Gabriel Bonjoc sa DEPP nga padung molusot, dayon mitingog ang final buzzer.
Labaw niadtong tungora ang CHARM og usa ka punto 80-79, apan tungod sa maong foul nakahigayon si Bonjoc sa free throw line ug mipasulod sa iyang duha ka mga itsa.
Karong adlawa, mag-abot ang DEPP ug Capitol Reporters alang sa championship sa NBA-C in connection sa selebrasyon karong adlawa sa 2013 Press Freedom Week.
* * *
PAGTULON-AN: Ang kagawasan adunay limitasyon.
* * *
- Latest
