OZ Racing mopasiugda'g Mountainbike Downhill

CEBU, Philippines -  Mga tang-ang downhill racers lukop nasud ang mag-abot  alang sa ipahigayong Drop National Series Round 5 Mountainbike Downhill Race karong Biyernes ug Sabado didto sa Canso X Mountain Adventure Park sa Balamban, Cebu.

 Gipasiugdahan sa OZ Racing, ang lumba gibahin sa pito ka kategoriya -- open, expert, 40-above, 30-above, 20-above, 19-below ug local beginners category.

 Ang Downhill Mountainbike race giisip nga usa ka extreme sports nga nagsugod niadtong dekada 90. Ang usa ka rider kinahanglan momaneobra sa iyang bisikleta sa usa ka dulhugon nga rota diin paninguhaon sa mga riders nga makuha ang labing paspas nga oras.

 Gawas sa national riders nga gipangulohan ni defending champion JR Barba, mosalmot usab sa  kompetisyon ang usa sa mga banggiitang riders sa Asya nga si Tan Hong Chun sa Singapore. Si Chun maoy dinapit nga elite rider sa maong kompetisyon.

 Mokabat ngadto sa P60,000 nga ganting salapi uban ang mga give-aways ang ipanghatag sa  top finishers sa matag kategoriya.    Ang modaog sa matag kategoriya mao usab ang morepresentar sa Pilipinas sa international race nga adto ipahigayon sa Australia. (BANAT NEWS)