UV, CEC basketball team daog

CEBU, Philippines -  Miiskor dayon og daog  ang  University of the Visayas (UV) ug Cebu  Eastern College (CEC) human ilang

gipukan ang  tagsa-tagsa nilang kaatbang sa elementary basketball sa pagsugod sa 18th Milo Little Olympics Visayas

Regional Finals kagahapon.

 Apan ang labing taas nga duwa kagahapon mao ang triple overtime nga kadaugan sa St. Alphonsus Catholic

School (SACS) sa Lapu-Lapu City batok sa University of San Jose-Recoletos (USJ-R), 65-58.

 Ang UV mibuntog sa Don Bosco Technology Center (DBTC) sa iskor nga 55-46, samtang ang CEC walay

kukaluoy nga nimasaker sa Guadalupe Elementary School sa iskor nga 89-28. Midaog sab ang Virgen de la Escuelas Pias

batok sa Bo. Luz Elementary School, 55-35 ug ang Monterey School sa Talisay City midaog sab batok sa ilang karibal

gikan sa Oprra Elementary School, 42-31.

 Mao kini ang unang higayon nga ang elementary basketball gilakip sa Milo Olympics. Gawas sa basketball,

lain pang sporting disciplines nga tigian sa duha ka weekend nga kompetisyon nga gipaluyohan sa Nestle Philippines mao

ang  athletics, swimming, badminton, chess, football, gymnastics, lawn tennis, scrabble, sepak takraw, sipa, table tennis,

taekwondo ug volleyball. (BANAT NEWS)