Junior Webmasters nakarekober, gipanitan ang Greywolves

CEBU, Philippines -  Nakarekober ang University of Cebu (UC) Junior Webmasters  gikan sa ilang kapildihan dihang ilang gipahimungtan ang Don Bosco Technology Center (DBTC) Greywolves, 65-38 kagabii sa nagpadayong 13th Cebu Schools Athletic Foundation Inc. (CESAFI) didto sa Cebu Coliseum.

 Ning pagsuwat, suwayan sab sa UC Webmasters nga mokulit sa ilang unang daog human mapilde ngadto sa University of the Visayas (UV) Green Lancers, 62-81 atol sa opening day  niadtong Agosto 3.

 Hinay kaayo ang pagsugod sa Junior Webmasters diin igo lang milabaw og dos puntos, 10-8 human sa unang 10 minutos sa duwa.  Didto na sila nanginit sa second period aron moposte og 22 puntos nga labaw sa halftime, 36-14.

 Tataw nga walay ikasugakod ang Greywolves  sa mosunod nga duha ka kuwarter ug gitapos sa Junior Webmasters ang third period sa iskor 49-25 paingon na ngadto sa kadaugan.

 Si Daryl Shane Menina miiskor og 16 puntos, samtang si Justin Dacalos mitampo'g 10 puntos alang sa Junior Webmasters nga nagbitbit og 1-1 nga baraha.

 Ang Greywolves nga wala pa makatilaw og daog sa upat ka duwa, gipangulohan ni Steven Angelo del Campo pinaagi sa iyang 15 puntos. (BANAT NEWS)