CEBU, Philippines - Ang beteranong Cebuano kickboxer nga si Kru Robert 'Maldito'Serdone nangahas sa pagpalagpot sa trono ni reigning Ground and Pound Championship (GPC) lightweight champion Lorde Rey 'Punisher' Yamit sa Mindanao dihang magsangka kini sa undercard sa gipaabot nga "Ground and Pound 7: Resolution" Mixed Martial Arts (MMA) showdown sa Agosto 31 diha sa Cebu Coliseum.
Ang pambato sa Redneos Iron Gladiator MMA sa Talisay City mipadayag sa taas niyang kompiyansa nga makuha niya ang bakus ni Yamit, kinsa mohimo sa iyang unang pagdepensa sa bakus nga iyang nakuha pinaagi sa third round stoppage ni Mark Araneta sa main event sa GPC 6: Retribution sa miaging tuig diha gihapon sa Cebu Coliseum.
"I know that I am the underdog going up against the champion, pero confident ko and ako paningkamuton nga mabalik dinhi sa Cebu ang bakus," matud pa ni Serdone nga adunay 8-2 win-loss record. "Wala ko'y plano moaway niya sa ground. Ang akoa mao ang stand-up fight aron mahimo nako ang knockout."
Si Serdone lab-as pang mihaw-as og "unanimous decision" nga kadaugan batok ni Ian Jundin niadtong Marso didto sa Naga Sports Complex.
Sa iyang bahin, gawas sa pagdepensa sa iyang GPC title, laraw usab ni Yamit nga makabawi human ang iyang second round knockout nga kapildihan ngadto ni Jimmy Yabo sa URCC-Cebu niadtong Enero 20 didto sa J Centre Mall.
"I am sure that this fight will not go the distance," matud pa ni Yaw-Yan ArDigma Cebu CEO/Founder Master Benigno 'Ekin' R. Caniga Jr. "This is another classic match of a grappler (Yamit) against a pure striker (Serdone). Let’s see who will prevail this time."
Sa main event si Cebu-based British fighter Cris 'Lindol' Brooks sa Yaw-Yan ArDigma Cebu makigsangka sa taga-Davao nga si Lloyd Abucayan sa Mindanao's Beefit Pythons Pit alang sa bakanteng GPC heavyweight crown.
Ang mga tiket nagkantidad og P200 sa upper box, P400 sa lower box, P750 sa ringside ug P1,500 sa VIP seats. Alang sa ticket reservations, mahimong motawag sa numero 0932-4524999. (BANAT PALARO)