Noeh's Utrimix daog na sab

 CEBU, Philippines - Midaog na sab ang Noeh's Utrimix Deeje human makalingkawas sa sikit kaayo nga duwa batok sa Haydell Crispy-UV, 65-62 sa nagpadayong Lapu-Lapu Sports Club (LLSC)  15-under junior basketball tournament niadtong Domingo didto sa barangay Basak gym, dakbayan sa Lapu-Lapu.

 Isig pabuhagay og mga puntos ang duha ka kampo pagsugod sa duwa nga miresulta sa panagtabla, 25-all paghuman sa first period.

 Medyo mikunhod ang iskor sa mosunod nga mga kuwarter  tungod sa kahugot na sa depensa nga gipatuman sa duha ka koponan, apan ang Noeh's Utrimix Deeje maoy mipatigbabaw.

 Gipangulohan ang kadaugan sa Noeh's Utrimix Deeje ni Grijaldo pinaagi sa iyang 18 puntos, gisundan ni Roel Sagang nga adunay 13 puntos.

 Ang Noeh's Utrimix Deeje nga igo lang molabaw og uno punto matag human sa mosunod nga tulo ka kuwarter, nagtangag karon og 2-1 nga baraha.

 Bugtong si John Bicar lang ang miiskor og double figures nga 15 puntos alang sa Haydell Crispy, kinsa mao na lang ang team nga wala pa makatilaw og daog sa ilang tulo ka duwa.

 Sa laing aksiyon, ang Prime Hoops School milansang sab og  daog human ilang gipilde ang Ibabao-Estancia, 60-49.

 Si Demar Arranchado mikandos og 18 puntos aron pangulohan ang Prime Hoops School. Si Clifford Cueto mitikdol og 12 puntos, samtang sila si Emman Yaun ug Kent Ponpon mitimang og 10 puntos matag usa.

 Ang  naparot nga Ibabao-Estancia gipangulohan ni Mandy Soco nga miratsada og 13 puntos.  Ang Prime Hoops School, Ibabao-Estancia ug Noeh's Utrimix Deeje kasamtangang nagsawo sa unang dapit

sa standing sa  managsama nilang 2-1 win-loss records ning maong torneyo nga gipaluyohan ni Basak Brgy. Capt. Belong Darnayla uban sa suporta ni Lapu-Lapu City Councilor Harry Radaza ug sa JB Sportswear ni Billy Nadado.

PUNTOS MATAG USA

Unang duwa:

 NOEH'S UTRIMIX DEEJE (65) - Grijaldo 18, Sagang 13, Diola 8, Mangubat 6, Torres 4, Rupal 4,

Oximoso 4, Maloloy-on 3, Deeje 3, Ycong 2

 HAYDELL CRISPY (62) - Bicar 15, Dela Rama 9, Nadado 8, Tubio 8, E.J. Perales 8,  Perales 5, Ochea 4,

Francisco 4

Ikaduhang duwa:

 PRIME HOOPS SCHOOL (60) - Arranchado 19, Cueto 12, Ponpon 10, Yaun 10, Del Mar 3, Teves 3,

Gallardo 2, Hontilano 2