FIBA-Asia ug CESAFI atangi

Mga basketball dinhe sa atong nasud dunay katarungan nganong angayan sila malipay karong buwan sa Agosto tungod kay sugdan na karong Agosto 1 hangtod sa Agosto 11 ang 27th FIBA-Asia Championship didto sa Mall of Asia (MOA) arena ug didto sa Ninoy Aquino stadium.

Dinhe sa Sugbo, naghinam-hinam na sab ang mga fans sa Cebu Schools Athletic Foundation, Inc. (CESAFI) kinsa nag-atang na sa pagbukas sa ika-13 nga season diha sa Cebu Coliseum sugod karong Agosto 3.

Ang labing gikahinaman nga engkwentro mao ang panagbagat tali sa defending champion Southwestern University (SWU) Cobras batok sa runner-up University of the Visayas (UV) Green Lancers unya sa Agosto 17.  Duha na ka higayon sa mga dagkung torneyo nga wala makabawos ang Lancers sa Cobras---ang una atol sa best-of-five CESAFI finals sa miaging tuig nga milanat gyud og Game 5.

Giusban sa Cobras ang Lancers sa finals sa Philippine Collegiate Champions League (PCCL) diha gihapon sa Cebu Coliseum. Sa maong duha ka duwa, kanunay dumadaog ang Lancers apan kanunay sab makalusot ang Cobras.

Ilabi na gyud tingali karon sa ilang ikatulong panagbagat sa CESAFI tungod kay misamot kalig-on ang Cobras kinsa mikuha na sab og laing imports nga maoy ilang hulip kanilang  Ben Mbala ug Justin Aboude.

Taas ug dako kaayo'g lawas ang gipuli ni Mbala nga si Fabrice Sewe nga sa barug pa lang daan daw mahawngan na ang mga kontra ug segurado gyung magpista siya sa rebounds sa iyang gitas-on nga 6-11. Dili lang tingali kay magpista, cannibalize-son pa gyud niya ang iyang kontra sa iyang barug nga daw si "Incredible Hulk"  ug  duol na lang  gyud kaayong  kab-oton ni Sewe ang ring ug ambot ug unsaon pagdepensa  sa ubang teams nga wala mokuha'g foreign imports.  

Dugang niini, ang ilang gipuli kang Aboude nga si Landry Sanjo, mas consistent sa free throw ug kugihan sab nga import.

Silang Sewe ug Sanjo maoy makigharung kanilang Steve Cedric Akomo ug  Djoutcheu Nzeusseu  sa Lancers.

 Ato kining paaboton nga duwaa kay segurado gyung sell-out crowd ug dili magmahay sa ilang bayad ang mosaksi niining duwaa didto sa Cebu Coliseum.

Tinuod lig-on ang Cobras ug una nakong nasaksihan ang ilang duwa dihang sila maoy kampyon didto sa Bogo Inter-Collegiate basketball tournament kaniadtong Sabado, Hulyo 20.

Sa maong duwa, nasuwayan gyud ang ilang kalig-on tungod kay diriyot silang madiskuhedo batok sa University of San Carlos (USC) Warriors kinsa milabaw og 17 puntos apan mikulapso sa fourth period gihang migamit og full-court press ang Cobras.

Laing team nga seguradong dunay ikabuga karon nga season nga posibleng moabot gyud sa final four mao ang USC Baby Warriors nga kalit lang sab milig-on ubos sa ilang bag-ong coach nga si Britt Carlo Reroma, ang champion coach sa San Beda Red Cebus kinsa maoy migiya sa iyang team ngadto sa three-peat sa NCAA juniors division didto sa Manila.

Sa FIBA-Asia, nagpanikad na sad ang host team Smart Gilas Pilipinas diin tinguha nilang ipa-ila sa tibuok kalibotan nga usa ang Pilipinas nga maayo sa natad sa basketball dinhe sa rehiyon sa Asia.

Usa sa atong bantayan niini mao ang atong kababayan nga Sugboanon nga si Junemar Fajardo, ang garbo sa lungsod sa Pinamungajan, produkto sa UC Webmasters ug dugang pa gyud niini, siya maoy no.1 draft pick sa PBA sa Petron Blaze.

Ang kumpleto ug opisyal nga line-up sa Gilas Pilipinas mao silang Japeth Aguilar ug L.A. Tenerio sa Barangay Ginebra, Jimmy Alapag, Jayson Castro, Ranidel De Ocampo  ug Larry Fonacier sa Talk 'N Text, Jeff Chan ug Gabe Norwood sa Rain or Shine, Gary David sa Global Port, Marc Pingris sa San Mig Coffee, ang naturalized player nga si Marcus Douthit ug si Fajardo.