Warriors miihaw sa Panthers

CEBU, Philippines - Nanginit ang University of San Carlos (USC) Baby Warriors sa third period nga maoy gihimo nilang hinagiban pag-ihaw sa University of  Southern Philippines Foundation (USPF) Baby Panthers, 56-37 sa ilang tune-up game  niadtong Miyerkules didto sa USC-North Campus gym sa   General Maxilom avenue, ning dakbayan.

 Ang  Baby Warriors nagbaton na og 5-1 nga rekord sa ilang tune-up games nga nagpamatuod kun unsa na sila ka andam alang sa  13th  season sa Cebu Schools Athletic Foundation Inc. (CESAFI) nga sugdan sa Agosto 3 diha sa Cebu Coliseum.

 Ang undergoal basket ni Scott Aying maoy naghatag sa Baby Warriors ni   coach Britt Carlo Reroma og 11 puntos nga abante, 36-25. Gikan niadto, wala na papugong ang  Baby Warriors aron mamentinar ang 19 puntos sa kinatibuk-ang fourth quarter.

 Si Reroma mao ang  coach kaniadto sa NCAA three-peat champion San Beda Red Cubs.

 Ang Baby Warriors miposte sa labing daku nilang labaw nga 21 puntos, 54-33  sa drive ni Glenn Suelto sa nahabiling tres minutos sa duwa. Si Suelto maoy  nangu sa Baby Warriors sa iyang 16 puntos, samtang  si  Aying miamot og 13 puntos.

Bag-o lang midaog ang Baby Warriors batok sa Sacred Heart School-Ateneo de Cebu (SHS-AdC) Magis Eagles niadtong miaging Sabado didto sa Cordova.

 Ugma, ang Baby Warriors ug  University of the Visayas (UV) Baby Lancers mao na sab ang magsangka didto sa lungsod sa Sibonga.

 Ang Baby Warriors ug ang Baby Lancers maoy magbagat sa opening day sa CESAFI  sa juniors division. 

PUNTOS MATAG USA

 USC  (56) - Suelto 16, Aying 13, Antigua 6, Dela Cruz 6, J. Galinato 6, Malazarte 4, Sable 2, Antigua 2, P. Galinato 2, Baltazar 2, Villagracia 2  USPF (37) - Bahio 9, Villlaner 7, Isok 6, Meca 3, Cantillas 2, Espinosa 2, Escober 2, Pepito 2