UV Lancers miuli walay daog, apan napuno'g kasinatian

CEBU, Philippines -  Ang University of the Visayas (UV) Green Lancers nga maoy nagdala sa bandila sa Pilipinas  nataktak na sa 27th Summer Universiade didto sa Kazan, Russia nga wala makahagdaw bisan usa lang ka daog sud sa lima ka duwa.

 Apan nabuhong sila'g kasinatian sa ilang pakigduwa batok sa mga dekalibreng koponan nga gikonsidera isip "Olympics" sa labing maayong mga atleta gikan sa  lain-laing unibersidad sa tibuok kalibotan.

 Sa  ilang pagsulong, ang UV Lancers nga gipaluyohan sa Haier ug  Du Ek Sam nagpas-an na'g bug-at nga bagahi kay napunta sila sa bracket  diin nagpundok ang mga lig-on koponan nga gipangulohan sa two-time defending champion Serbia, Romania, Mexico, Japan ug Mongolia.

 Apan si UV Green Lancers team manager Samsam Gullas,  mibutyag nga sa ilang pagsalmot, wala sila mag-apas og daog,  kun dili  makarepresentar og tarung alang sa nasud.

 Ang ilang pagsalmot mapahimuslan usab nila nga nangandam alang sa Cebu  Schools Athletic Foundation Inc. (CESAFI) Season 13 nga sugdan sa Agosto 3 diha sa Cebu Coliseum.

 Didto sa Kazan, ang UV Green Lancers gilubong dayon sa Romania sa una nilang duwa, 106-58. Ang makauuwaw nga kapildihan nausban dihang gilubong sab kini sa Serbia, 125-44.

 Sa kadagku ug mas tag-as nilang European nga mga karibal, ang UV Green Lancers nakahimo og kinatibuk-ang 67 ka turnovers sa ilang unang duha ka duwa.

 Napilde usab ang UV Lancers ngadto sa Japan sa iskor nga 93-51 ug sa Mongolia, 79-92.

 Katapusang nakapilde sa UV Lancers mao ang Mexico pinaagi sa paglubong og 72 puntos sa iskor nga 139-67. (BANAT NEWS)