CEBU, Philippines - Plansado na ang tanan alang sa pormal nga pagbukas sa 18th Sacred Heart Ateneo Alumni Basketball Athletic Association (SHAABAA) Season sa Hulyo 21 didto sa Sacred Heart School-Ateneo de Cebu gym Canduman, Mandaue City.
"Mao ni ang among ika-18 nga season. We are very happy and we are going strong," matud pa ni SHAABAA president Marcelino Co atol sa senemanang SCOOP-Cebu forum kagahapon didto sa Baseline Restaurant nga gipangulohan ni Robert 'Bobby Knight' Inoferio, kinsa mao usab ang commissioner sa liga.
Napulo ka koponan ang kompirmadong mosalmot karong tuiga nga pangulohan sa defending champion Cebu Landmasters, uban sa Goldberry Suites, RDAK Transport, Gaisano Capital, Alberto’s Pizza, San Jose Bakeshop, A-Team, MILCO Fresh Eggs, Insular Square ug San Remigio Aguilas.
Ang mga partisipanteng koponan moduwa og single round robin sa eliminasyon diin ang top eight moabante sa quarterfinals. Ang mahabiling upat magsangka pag-usab alang sa bakanteng duha ka luna sa finals. Ang championship himuon pinaagi sa "best-of-three" series.
Si Co naglaraw sab nga modugang laing sporting events sama sa football, badminton, bowling ug billiards.
Sa laing bahin, ang selection sa best muse ug best in uniform mao gihapon ang highlight sa opening ceremony nga pagatambongan ni SHS-Ateneo de Cebu President Manny Uy, S.J.