Sevillano, Nadera naghari sa CEPCA U-16 chessfest
CEBU, Philippines - Mipatigbabaw sila si Rhenzy Kyle Sevillano ug Laila Camel Nadera sa tagsa-tagsa nila ka dibisyon sa Cebu Executives and Professionals Chess Association (CEPCA) under-16 rapid tournament niadtong Domingo didto sa Deep Blue Café sa SM City-Cebu.
Si Sevillano miiskor og krusyal nga daog batok ni Duane Borgonia sa final round aron maghari sa boys category uban ang 6.5 puntos.
Sila si Sevillano ug Felix Shaun Balbona mitapos sa 7-round Swiss system competition bitbit ang 6.5 puntos matag usa, apan si Sevillano maoy miangkon sa unang dapit kortesiya sa higher tie-break output. Si Jethro Ysmael Claro mipuwesto sa ikatulo sa iyang sayes puntos. Mikompleto sa top five finishers mao sila si Christian Klent Pondyo ug James Andrew Balbona.
Sa girls division, si Nadera nagkatabla ni Jeremy Rose Bajo sa katapusang hugna ug igo na kaayo alang kaniya aron masakmit ang champion's trophy uban ang 6.5 puntos.
Si Vic Clysen Derotas, kinsa mitapos sa iyang kampanya pinaagi sa kadaugan batok ni Sheila Mae Diloy mipahiluna sa ikaduha uban ang 6.0 puntos. Sila si Diloy, Bajo ug Alphecca Gonzales mikompleto sa top five finishers nga adunay 5.0 puntos matag usa.
Gawas sa mga tropeyo ug ganting salapi, ang top three finishers sa matag kategoriya makaangkon sab og luna alang sa Batang Pinoy National Finals sa nanghinapos nga bahin ning tuiga.
Gipasiugdahan sa CEPCA sa pagpangulo sa ilang presidente Jojo Muralla, ang duha ka adlaw nga kompetisyon nahimo usab nga posible pinaagi sa suporta ni chess patron Engr. Benjamin 'Bogie' Lim sa Rose Pharmacy. Ang mga duwa gidumala ni FIDE Arbiters Felix Poloyapoy Jr. ug Marvin Ruelan. (BANAT NEWS)
- Latest
