Bartoli maoy kampyon
CEBU, Philippines - Yano kaayong gihuman ni Marion Bartoli sa France ang iyang finals match batok ni Sabine Lisicki sa Germany pinaagi sa 6-1-6-4 nga kadaugan aron sakmiton ang titulo sa women's singles sa Wimbledon kagahapon nga maoy labing una niyang grand slam title.
Ang 28 anyos ug 15th seed nga si Bartoli nakapahimulos og maayo gikan sa daghan kaayong unforced errors ni Lisicki kinsa nag-atubang sab ug daku kaayong tahas sa iyang career.
Sa 1-5 nga biya sa second set, mao na sa ginhawa ni Lisicki nga makasikit ug mi-iskor siya dihang iyang napakgang ang tulo ka match points ni Bartoli alang sa 4-5 nga biya pinaagi sa iyang pipila ka aces.
Si Bartoli mao'y unang French player nga midaug og grand slam title sukad ni Amelie Mauresmo nga mao na karo'y iyang coach.
"As a small girl I dreamed about this moment," matod pa ni Bartoli samtang gi-interbyu siya didto sa courtside human sa awarding ceremony diin iyang giisa ang matahum ug sinaw kaayong Venus Rosewater dish didto sa Centre Court.
Sumala pa usab ni Bartoli "Finishing with an ace to win Wimbledon, even in my wildest dreams I couldn't have imagined that. Honestly, I cannot believe it. I have practised my serve for so long, at least I kept it for best moment!"
Ang 23rd seed nga si Lisicki mao'y paborito sa maong sangka tungod kay pulos bug-at nga kontra ang iyang gipangpukan nga naglakip sa defending champion nga si Serena Williams sa fourth round ug ingon man ang runner-up sa miaging tuig nga si Agnieszka Radwanska sa Poland atol sa semifinal.
"You try to calm yourself down as much as you can with different techniques, breathing techniques that usually help, but didn't help today," matod pa ni Lisicki. (BANAT PALARO)
- Latest
