Sigue-Bensi tandem cipu 3-point champion

CEBU, Philippines - Maoy gikoronahan isip mga hari sa three-point shootout ang tandem nilang Ferdie Sigue ug Rex Bensi sa Canillas Brokers (Yoryoj)  atol sa 1st  Cebu International Port Users (CIPU) All-Star Game kaniadtong Sabado didto sa barangay Cogon-Ramos gym, ning dakbayan.

Miabante sa finals silang Sigue ug Bensi isip no. 1 team human sila makakuha'g 24 puntos sa first round---12 puntos matag usa samtang ang FYA Selection sa managsoong Noel ug Baeng Medalle nakakuha'g 19 puntos  ug ang tandem nilang Loreto Castillo ug Junior  Tandas sa Mac Nels nakakuha'g 17 puntos.

Ang top three tandems lang maoy miabante sa semifinals ug ang  laing lima ka teams natagak nga mao ang Petracorta Brokers, Ynah Brokers, Alin Brokers, Gonzales Brokers ug Avenido Brokers.

Midaug silang Sigue ug Bensi sa final round human sila mo-iskor og 17 puntos ug kulba-hinam kaayo ang ilang enkwentro batok sa Medalle brothers kinsa biya lang og dos puntos human mawagtang ang "consistency" ni Baeng kinsa nakahimo'g 11 puntos sa first round apan igo na lang nakahimo'g sayis puntos sa second ug final round.

Dili parehas nilang Sigue ug Bensi nga wala maglayo ang puntos---9 ug 8 sa final round.

Si Sigue kinsa maoy idolo si Ray Allen, ang tirador sa Miami Heat, maoy usa sa labing maayong pure shooter sa CIPU ug ang iyang team nga West All-Star-White maoy sab ang midaug sa ilang All-Star Game baok sa East All Star-Green sa iskor, 102-92.

Hinoon, wala na kinahanglana ang puntos ni Sigue alang sa White dinhang nag-igo silang Rocky Lim, Janus Abellana ug Baneg Medalle.

Si Francis Palero maoy nangu sa East All-Star-Green sa iyang 18 puntos.

Ang CIPU All-Star Game gihimo usa ka semana sa dili pa ang ilang semifinals karong umaabot Sabado diin magtinaktakay ang Petracorta Brokers batok sa Canillas Brokers ug ang FYA Selection batok sa Ynah Brokers.

Puntos matag usa:

West-West (102)----    Lim 22, Abellana 21, B. Medalle 18, Cayanong 15, N. Medalle 9,Plando 9, Bensi 5, Mondin 2

East-Green (92)----    Palero 18, Villaronza 13, Singson 13, Barral 10, Garcia 9, Carmen 6, Castillo 5, Alaan 4, Peras 4, Pepito 4, Sagario 3, Alin 2.