CEBU, Philippines - Misaad og impresibong kadaugan ang Japanese world title challenger nga si Tomoki 'El Mexicanito' Kameda (27-0, 18KOs) sa iyang pagsuway og sakmit sa WBO bantamweight title nga gihuptan ni South African fighter Paulos Ambunda (20-0, 10KOs) sa Agosto 1 didto sa Waterfront Cebu City Hotel and Casino.
Si Tomoki nga kasamtangang nag-ensayo diha sa Rex 'Wakee' Salud Gym nakig-sparring na sa mga Pinoy
contenders sama nila ni kanhi OPBF challenger Marco Demecillo ug reigning WBO Asia Pacific Youth Flyweight champion Romnick Magos.
"I feel good training here in Cebu, I will give my best because I want to get that belt and it’s my main goal to be a world champion," matud pa sa 22-anyos nga si Tomoki, ang kinamanghuran sa tulo ka sikat nga managsuong Kameda sa Japan.
"My plan is to use my reach advantage in fighting him (Ambunda) and if there will be a chance, I am going to knock him out."
Si Tomoki nga nag-ensayo ubos sa giya ni Cebuano trainer Sulpicio Ano-os, nagtinguha sa labing una niyang world title aron mosunod sa lakang sa iyang maguwang nga si Koki, ang WBA bantamweight king.
Sa supporting main event sa maong boxing card nga gipasiugdahan sa Kameda Boxing Promotions ug Rex 'Wakee' Salud Promotions, si Marlon Tapales makigharong ni Fredirex Rodriguez sa Bukidnon.
Mokumpleto sa undercard mao ang sangka nila ni Gerpaul Valero batok Daryl Basadre, undefeated Jack
Tepora batok Anthony Galigao, Ardie Boyos batok JayR Mendoza, Charlie Pucdol batok Neil Tabanao, Richard Rosales batok Jonathan Francisco, Joey Canoy batok Marwin Cristota, Richel Rosales batok Andrew Palas ug Joyjoy Pormentera batok Dante Rosales. (BANAT PALARO)