Ynah ug canillas abante sa CIPU semis

CEBU, Philippines - Parehong miabante sa semifinals ang Ynah Brokers ni Edwin Carmen ug ang Canillas Brokers (Yoryoj) ni Roy Canillas human ilang gipangpukan ang tagsa-tagsa nila ka karibal niadtong Sabado sa hapon sa nagpadayong 2nd season sa Cebu International Port Users (CIPU) basketball tournament didto sa Cogon-Ramos gym, ning dakbayan.

Unang nakakuha'g luna sa semifinals ang Ynah Brokers human ilang gipalagpot ang Alin Brokers ni Israel Alin sa iskor, 70-65 ug miabante sab ang Canillas human ilang gitagak ang Mac Nels Forwarders, 88-83. Sulagma lang kaayo nga ang duha ka mananaug nga teams niadtong adlawa parehong midaug og singko puntos.

Gisugat og kadaugan ang Davao-based PIL Shipping Lines operations manager nga si Jury Garcia kinsa usa sa mga higala ni Carmen ug naka-amot og kuatro puntos sa ilang kampanya. Ang iyang manghud nga si Jeff Garcia mi-iskor og singko puntos apan si Cris Manulat maoy nangu sa ilang team sa iyang 15 puntos.

Si Ryan Villomo maoy nangu sa Alin Brokers sa iyang 22 puntos ug miamot si Alin og 10 puntos.

Sa laing bahin mibahug og 21 puntos matag usa silang Jim Volla ug Marvin Sillar aron pangulohan ang Canillas samtang midugang og 12 ug 10 puntos silang Ferdie Sigue ug Dodong Manlosa.

Wala makaduwa si Kenneth Kern Sesante alang sa Canillas apan maayong nakadala sa iyang position isip point guard di Tony Largosa kinsang mga free throws sa uwahing bahin sa duwa maoy nagselyado sa ilang kadaugan.

Nalupig sa Canillas ang Mac Nels sa ilawom tungod kay daghan  og produksiyon ang ilang big men.

Ang big man sa Mac Nels nga si   Songson mikadlit og 26 puntos apan walay laing nakatabang kaniya gawas sa ilang gamitoy apan paspas nga point guard nga si Dellosa kinsa misakmit og 17 puntos samtang si Loreto Castillo may 11 puntos.

Sa unang quarter pa lang daan, na-fouled out na si  Alaan hinungdan nag-duwa ang Mac Nels og upat ka players kontra sa Canillas nga lima ka players.

Krusyal nga baskets nilang Rex Bensi, Manlosa ug mga free throws nilang Villa ug Largosa maoy nahimong yawe sa kadaugan sa Canillas, ang defending champion sa maong torneyo.

Matod pa ni Canillas kinsa mao sab ang ilang coach, dili niya mahulagway ang iyang kalipay nga nakalusot sila gikan sa nagsunod-sunod nga pilde sa elimination round.  (BANAT PALARO)