CEBU, Philippines - Usa ka talagsaong world title fight ang mahitabo dinhi sa Sugbu diin duha ka mga langyaw'ng boksidor ang mag-ilog sa kalibutanong bakus sa Agosto 1 didto sa Waterfront Cebu City Hotel and Casino.
Kini human si WBO bantamweight title-holder Paulus Ambunda (20-0, 10KOs) sa Namibia gitakda nga modepensa sa iyang titulo batok ni Japanese challenger Tomoki Kameda (27-0, 18KOs).
Mao kini ang labing unang pagdepensa ni Ambunda sa iyang bakus nga iyang nailog gikan ni kanhi Thai champion Pungluang Sor Singyo pinaagi sa unanimous decision niadtong Marso 2 didto sa Namibia.
Si Sor Singyu kun kahinumduman, maoy mipukan ni ALA Gym boxer AJ 'Bazooka' Banal sa ilang world title fight niadtong Oktubre 20 didto sa SM Mall of Asia Arena sa Pasay City.
Ning higayona, si Ambunda makigharong sa lig-ong Japanese warrior nga si Kameda, ang kinamanghuran sa nabantog nga Kameda brothers sa Japan.
Si Tomoki laraw nga mahimong world champion sama sa iyang maguwang nga si Koki Kameda, kinsa maoy nagkupot sa WBA bantamweight title.
Ang world title showdown gipasiugdahan sa Kameda Boxing Promotions uban sa pakigtambayayong sa Rex 'Wakee' Salud Promotions.
Si Tomoki miabot na kagahapon sa gabii dinhi sa Sugbu ug gitakdang mopahigayon og sparring session karong hapon diha sa RWS gym sa Brgy. Punta Princesa, ning siyudad.