CEBU, Philippines - Misaad si reigning MVP LeBron James nga iyang pas-anon sa iyang abaga ang Miami Heat aron malikayan ang 1-3 nga biya ug dili mabutang sa peligrosong sitwasyon batok sa San Antonio Spurs sa Game-4 sa NBA Finals karong adlawa didto sa AT&T Center sa San Antonio, Texas.
Human sa ilang makauuwaw nga kapildihan sa Game-3 niadtong Miyerkules sa iskor nga 77-113, si James nanganti nga mohimo'g usa ka talagsaong performance karong adlawa aron tablahon ang series, 2-2.
Sa Game-3, si James igo lang miiskor og 15 puntos ug milangkat og 11 ka rebounds.
"He's going to find his way. He's going to get in a groove. As teammates you try to figure out a way to get him an easy basket in a breakout, try to get it back to him, get a lay-up, so he can see the ball go in," matud pa ni Dwyane Wade.
Gawas sa Game-3, ang Game-4 karon ug Game-5 sa Hunyo 17 magpabilin sa balwarte sa Spurs ug kinahanglan nga modaog ang Heat karon aron makabalik pa ang series sa ilang balwarte. Kun kinahanglan, ang Game-6 ug Game-7 adto duwaon sa American Airlines Arena sa Miami, Florida.