CEBU, Philippines - Kasado na ang tanan alang sa South to North kon SN250, ang labing taas nga ultramarathon sa nasud nga
mosikad ugma gikan sa Santander paingon sa Bogo City.
Ang lumba adunay gilay-on nga 250 kilometro, mas taas sa nabantog nga Bataan Death March nga adunay
160 kilometro.
Isip usa ka lisud ug makaluya nga lumba, ang organizers nga gipangulohan ni Jonel Mendoza sa FrontRunner
mihangyo nga ang mga partisipante kinahanglan nakatapos og labing menos duha ka 100km ultramarathons sa miaging 24
ka bulan.
Niadtong nakapasar sa qualifications, ang race bibs makuha karong alas-3 sa hapon didto sa Santander
Municipal Hall. Niadtong dili makakuha karon, mahimong makuha ugma sa dili pa ang lumba.
Ang lumba sugdan sa alas-5 sa buntag didto sa Santander subay sa Ginatilan, Malabuyoc, Alegria, Badian,
Moalboal, Alcantara, Ronda, Dumanjug, Barili, Aloguinsan, Pinamungahan, Toledo, Balamban, Asturias, Tuburan,
Tabuelan ug San Remigio sa dili pa matapos sa Bogo sa Domingo.
Ang event naglatid sa solo ug team relay nga adunay upat ka runners depende sa gender. (BANAT NEWS)