CEBAMA hari sa Surigao del Sur Commercial League

CEBU, Philippines -  Daw bagyo nga mihaguros ang Cebu Basketball Mania Association (CEBAMA) sa ilang pagbisita didto sa Mindanao dihang ilang gipabahaan og mga puntos ang Alameda Stug ni Surigao del Sur Vice Governor Manuel Alameda, 111-73   aron sakmiton ang korona sa Aras-asan, Cagwait, Surigao del Sur Commercial League niadtong Hunyo 7 didto sa Cagwait gym.

 Gidominar sa CEBAMA ang duwa ug ilang gisandigan si  Arnold Adormeo, kinsa miposa'g 21 puntos,

samtang laing upat niya ka teammates ang miiskor sab og double figures nga naglakip ni   team owner Jury Garcia    nga  adunay 12 puntos.

 Tulo ka players ang miiskor og 15 puntos alang sa pilderong Alameda.

 Ang Cagwait commercial league usa sa mga highlight  sa tinuig nga pangilin sa ilang mahal nga patron San Antonio de Padua sa Hunyo 13.  Gipasiugdahan kini ni Rodulfo Asperin Jr., ang presidente sa San Antonio School Alumni Association.

PUNTOS MATAG USA

 CEBAMA (111) - Adormeo 21, Colina 19, Awitin 18, Lamocha 15, Garcia 12, Cabadonga 8, Montero 5,

L. Torion 4, C. Torion 2, Pimentel 2

 Alameda Stug (73) - Gonzaga 15, Casinillo 15, Cabanog 15, Payot 6, Canda 6, Almadin 6, Atan 5, Milo 5 (BANAT PALARO)