CEBU, Philippines - Gitangtang na usab karon ni Filipino boxing icon Manny Pacquiao ang syudad sa Baguio sa listahan sa mga lugar diin iyang ipahigayun ang iyang training camp alang sa nagsingabot niyang sangka batok ni Brandon Rios sa Nobiyembre didto sa Macau.
Ang kampo ni Pacquiao nagkanayon nga dili na mobiyahe pa ngadto sa Baguio City si Pacquiao aron mag-ensayo tungod kay gusto niini nga adto nalang sa Mindanao sugdan ug tapuson ang iyang training camp.
Nasayran nga una nang namahayag si Pacquiao nga dili siya mopahigayun sa iyang training camp didto sa Wild Card Gym sa Los Angeles nga maoy dugay na niyang naandan.
“First week kasi ng September ang start ng training camp namin. Madalas pag ganung panahon matindi ang bagyo sa Baguio. Pag kasi umuulan, minsan naaapektuhan `yung roadworks namin,†matud pa sa nutritionist ni Pacquiao nga si Nonoy Neri sa Spin.ph.
Gitan-aw karon sa Team Pacquiao ang General Santos City ug Davao City nga maoy duha ka lugar diin mahitabo ang training camp sa kanhi eight-division world champion.
Hinuon, giklaro sa suod nga higala ug assistant trainer ni Pacquiao nga posible pang mausab ang detalye sa venue sa training camp ni Pacquiao kun mao ang imando sa head trainer sa ‘Pambansang Kamao’ nga si Freddie Roach. (BANAT NEWS)