CEBU, Philippines - Parehong mikulit sa ilang ikatulong daog ang University of San Carlos (USC), St. Johns Institute (SJI) of Bacolod ug ang Ateneo de Iloilo (Ad-I) aron mag-una karon sa CYBL VISMIN Goodwill Games 2013 didto sa SHS-Ateneo de Cebu Gym Canduman Campus sa dakbayan sa Mandaue.
Midaog ang USC sa SBP (Under 12) batok sa Cebu Eastern College, 38-34, ug dayon gisundan sa ilang daog batok sa Don Bosco, 51-19 aron magtabla sa liderato sa Group B kauban ang St. John’s Institute of Bacolod sa ilang 3-0 nga baraha.
Gilubong sa SJI ang USJR, 44-16 ug naka-eskapo sab sila batok sa UV, 47-46.
Sa Group A sa SBP division, aduna nay 3-0 nga record ang AdI human ilang gipukan ang NOODA Warriors of Bacolod, 53-40 ug ang SHS-Ateneo de Cebu, 48-42.
Sa laing duwa sa Group B ubos sa SBP division, napakgang sa UV ang Don Bosco, 56-30 ug midaug ang CEC batok USJR, 54-16. Sa Group A, gibihag sa SHS-Ateneo ang St. Benedict’s, 59-17 ug ang Xavier University (XU)-Ateneo de Cagayan midaug sab batok St. Benedict’s, 38-20.
Ang Ad-I dunay 3-0 record sa Group A ug gisundan sa SHS-AdC (2-1), XU (1-0), NOODA Warriors (0-2) ug St. Benedict’s (0-3). Sa Group B, USC ug ang SJI adunay 3-0, ang UV (1-2), CEC (1-2), Don Bosco (1-2) ug ang USJR (0-3).