CEBU, Philippines - Di mahitabo sa Taiwan national team ang nasinati sa Smart Gilas Pilipinas nga gibawalan nila pagpaduwa sa 35th William Jones Cup nga ipahigayun didto sa ilang nasud.
Bisan pa sa gibuhat sa Taiwan nga pagdili sa Smart Gilas nga makaduwa sa maong international tournament diin sila ang kampiyon, dili mahimo nga makabawos ang Pilipinas pinaagi unta sa pagdili usab sa mga Taiwanese nga makaduwa sa 27th FIBA Asia Championship sa Agosto dinhi sa nasud.
Si Samahang Basketbol ng Pilipinas (SBP) executive director Sonny Barrios nagkanayon nga walay gahum ang nasud sa pagbawal sa mga Taiwanese nga makaduwa sa FIBA Asia Championship tungod kay usa kini ka Asian qualifier.
Samtang ang Taiwan mahimo nga dili mopaduwa sa Smart Gilas sa Jones Cup tungod kay usa lang kini ka invitational tournament ug dili kini opisyal nga torneyo sa FIBA.
Sa iyang bahin si Smart Gilas head coach Chot Reyes nagkanayon nga aduna na silay gitan-aw nga torneyo nga posibleng maoy ilang iilis sa Jones Cup isip ilang tune-up tournament sa dili pa ang FIBA Asia Championship.
Gitan-aw karon ni Reyes ang posibilidad nga moduwa sila sa Japan o sa Australia aron usab lakip sa preparasyon sa national team.
Ang Smart Gilas mularga hinuon sunod buwan paingun didto sa Lithuania alang sa usa ka training camp diin ikaduwa nila ang mga tag-as ug hingigo nga mga players sa nagkadaiyang Lithuanian ball clubs. (LPM gikan sa wires)(BANAT NEWS)