Pagara paawayon sa Singapore

CEBU, Philippines - Mibunga dayun og maayong balita ang impresibong 12-round unanimous decision nga kadaugan ni ALA Gym fighter Jason ‘El Niño’ Pagara niadtong Sabado batok ni Aaron ‘Jewel’ Herrera didto sa Waterfront Cebu City Hotel and Casino.

Si Pagara gikataho nga paawayon ni Top Rank Inc. CEO Bob Arum didto sa Singapore alang sa Oriental and Pacific Boxing Federation (OPBF) light welterweight title.

Si Arum mibilib human makita ang tape sa away ni Pagara batok sa delikadong Mexican boxer nga si Herrera diin nadepensaan niini ang iyang WBO International light welterweight.

“I want to match Pagara against WBC No. 6 ranked Oriental Pacific Boxing Federation champion Min Wook Kim of South Korea who has a record of 10-1 with 7 knockouts,” matud pa ni Arum. “It will be a terrific fight.”

Kun ugaling mudaog si Pagara, si Arum miingon nga daku og posibilidad nga mahikay niya ang usa ka world title shot alang sa Filipino boxer kinsa moaway alang sa WBC title nga kasamtangang gihuptan sa undefeated nga si Danny Garcia.

Wala pay seguradong petsa nga gisulti ang Amerikanong promoter apan gusto niya nga sa hinapos nga bahin ning tuiga mahitabo ang Singapore fight ni Pagara. (LPM gikan sa Philboxing.com)